मंठा तहसीलचा कर्मचारी लाचलुचपत प्रतिबंध विभागाच्या जाळ्यात
मंठा -(सुभाष वायाळ) दि.4 मंठा तालुक्यामध्ये रेती व गौण खनिजे उत्खनन हे अवैधरित्या चालूच आहे. रेती व गौण खनिजे प्रतिबंधक पथकाची कारवाई मात्र शून्य आहे. अवैध गौण खनिज व रेती यासाठी तहसीलच्याच अधिकारी व कर्मचारी यांचा हात असतो हे कालच्या दिनांक 3 रोजीच्या लाचलुचपत प्रतिबंधक विभागाच्या कारवाईवरून सिद्ध झाले आहे. मंठा येथे मुरमाचे टिपर व ट्रॅक्टर चालू ठेवण्यासाठी मंठा तहसील मधील कर्मचारी विठ्ठल पांडुरंग बोरकर वय 34 वर्ष ह.मु.संत तुकाराम नगर मंठा यांनी एकूण 26 हजार रुपयांची मागणी तक्रारदार यांच्याकडे केली होती. परंतु तक्रारदार यांची लाच देण्याची इच्छा नसल्यामुळे त्यांनी लाचलुचपत प्रतिबंधक विभाग जालना यांच्याकडे संपर्क साधून मंठा तहसील येथे सापळा रचला व तहसील मधील कर्मचारी यांना सव्वीस हजार रुपयाची लाच घेताना रंगेहात पकडले. त्यांच्याविरुद्ध दि.04.01.2022 रोजी गु.रं.न.4/2022 कलम 7व 7अ लाचलुचपत प्रतिबंधक अधिनियम 1988 नुसार गुन्हा नोंद केला असून पुढील तपास लाचलुचपत प्रतिबंधक पोलीस निरीक्षक एस.एस.ताटे करीत आहेत.
